PANNAKATARABAY DAGITI BOTANTE ITI PRESINTO WENNO PAGBUTOSAN

Asino man a botante nga agkasapulan iti pannarabay gapu iti rason a pisikal, parikut iti panagkita, parikut iti panagdengngeg wenno di pannakabael nga agbasa ken agsurat ket mabalin a maipaayan iti espesial a pannarabay manipud iti asino man nga indibidual a pinili wenno kayat ti botante, malaksid iti employer ti botante, ahente wenno pannakabagi ti employer ti botante, wenno opisial wenno ahente ti union a pagkamengan ti botante (42 United States Code 1973aa-6).

Pannakatarabay Dagiti Botante nga Addaan iti Disabilities wenno Rikriknaen iti Bagi Bayat ti Kaaddada iti Pagbutosan iti Aldaw ti Eleksion

Amin a presinto wenno pagbutosan iti amin a paset ti Estado ket nalaka a madanon dagiti botante nga addaan iti diperensia wenno rikriknaen ti bagida. Dagiti botante a di makapanaw iti luganda tapno makapagbutosda ket mabalinda nga agbutos a mismo iti igid ti kalsada wenno iti luganda nga isu ti makunkuna a curbside voting. Adda met espesial a pagparkingan dagiti handicapped wenno adda diperensia ti bagida iti kaaduanna a pagbutosan wenno presinto.

Para kadagiti botante nga adda diperensia ti panagkitada, adda met dagiti magnification devices wenno lente a pagpadakkel iti letra nga usarenda bayat ti panagbutosda kadagiti presinto.

Pannakatarabay Dagiti Botante a Limitado ti Ammoda iti Inggles Bayat ti Kaaddada iti Pagbutosan iti Aldaw ti Eleksion

Kadagiti botante nga agkasapulan iti interpreter, kontaken wenno kaumanda laeng ti Chairperson wenno ti natudingan a Voter Assistance Official a nadutokan nga agtrabaho iti nasao a pagbutosan.

DAGITI DIRECT RECORDING ELECTRONIC (DRE) MACHINES KADAGITI PAGBUTOSAN

Sagudayen ti Seksion 301 (a) ti Help America Vote Act of 2002, maaddaan dagiti presinto wenno pagbutosan kadagiti masasao a Direct Recording Electronic voting machines tapno:

· Maisigurado ti kaadda ti privacy wenno panagwaywayas (tapno awan mangbibiang iti botante), ken tapno masalakniban ti karbengan dagiti botante nga addaan iti diperensia iti bagida ken dagiti botante a limitado ti ammoda iti Inggles.

· Maipaayan iti tulong dagiti indibidual nga addaan iti diperensia iti bagi, agraman dagiti bulsek ken adda diperensia ti panagkitada tapno makapagbutosda met.

· Maipaayan iti pagpilian a lengguahe dagiti botante kas mayalubog kadagiti rekisito ti Seksion 203 ti Voting Rights Act of 1965 (42 U.S.C. 1973aa-1a).

DAGITI NAYON A SERBISIO:

Para Kadagiti Tattao nga Addaan iti Diperensia iti Panagkita

Adda naka-tape record a palawag maipanggep iti panagbutos iti Hawaii a maala iti Office of Elections ken iti Library for the Blind and Physically Handicapped.

Para Kadagiti Tattao nga Addaan iti Diperensia iti Panagdengngeg wenno Panagsao

Dagiti impormasion wenno palawag maipanggep iti eleksion ket maalada babaen ti:

· Hawaii Voter Hotline’s TTY iti (808) 453-6150

· Toll-free TTY iti 1-(800) 345-5915 para kadagiti agnaed kadagiti isla iti ruar ti Oahu

· Verizon Hawaii’s Statewide Telecommunications Relay Service (TRS) para kadagiti tuleng ken adda diperensia iti panagsaoda iti 1711 wenno 643-8833 (TTY)

Para Kadagiti Botante a Di Unay Makaawat iti Inggles

Kadagiti botante a di unay makaawat iti Inggles, adda met dagiti kadaraanda a makasaritada iti bukodda a pagsasao ken makatulong kadakuada; no saan, adda met dagiti naisurat iti bukodda a pagsasao a mabalinda a basaen tapno malawlawagan dagiti kayatda a malawlawagan.

Malaksid iti lengguahe nga Inggles, adda met naisurat iti Ilokano, Hapon, ken Insik a Wikiwiki Voter Registration Form ken ti makuna nga Application for Absentee Voter Ballot (Aplikasion para iti Balota ti Absentee Voter). Naaramid daytoy kasa sagudayen ti Voting Rights Act of 1965 kas naamendaran.

ABSENTEE VOTING WENNO PANAGBUTOS A SAANKAN A MAPAN ITI PRESINTO

Asino man a rehistrado a botante ket mabalin nga agkiddaw iti absentee ballot babaen ti panangikoreona iti nakompleto wenno napil-apan nnga Application for Absentee Voter Ballot ken iturongna daytoy iti city/county clerk iti lugarda. Ti aplikasion ket masapul a maawat ti clerk iti di nasapsapa ngem innem a pulo (60) nga aldaw ngem di naladladaw ngem pito (7) nga aldaw sakbay ti maysa nga eleksion (HRS §15-4). Apaman met a maawat ti opisina ti Clerk ti nasao a kiddaw, ibusonnanto met ti absentee ballot agraman instruksion wenno rumbeng a suroten ti nasao a botante iti panangusarna iti balota.

Para iti nayon nga impormasion, mabalinyo a kontaken wenno kauman ti opisina ti city/county clerk iti bukodyo a lugar.

COUNTY CLERK OF HAWAII CITY CLERK OF HONOLULU

25 Aupuni Street, Rm. 105 530 S. King Street, Rm. 100

Hilo, Hawaii 96720 Honolulu, Hawaii 96813

TEL: (808) 961-8277 TEL: (808) 523-4293

FAX: (808) 961-8673 FAX: (808) 527-6888

COUNTY CLERK OF KAUAI COUNTY CLERK OF MAUI

4396 Rice Street, Rm. 106 200 S. High Street, Rm. 708

Lihue, Hawaii 96766 Wailuku, Hawaii 96793

TEL: (808) 241-6350 TEL: (808) 270-7749

FAX: (808) 241-6207 FAX: (808) 270-7171

Daytoy a Factsheet ket nairanta laeng a pangimpormar wenno pangilawlawag a saan ket a agbalin nga autoridad maipanggep iti paglintegan ti eleksion ken deadlines iti Hawaii. Dagiti kasapulan wenno rekisito ken/wenno deadlines ket mabalin nga agbaliw no adda met panagbaliw ti paglintegan. Para iti ad-adda pay detaliado ken hushusto a rekisito, konsultaen ti Hawaii Revised Statues ken dadduma pay a mabalin a pangalaan iti mainaig nga impormasion.

Office of Elections

802 Lehua Avenue

Pearl City, Hawaii 96782

Telepono: 808-453-VOTE (8683)

Kadagiti Isla iti Ruar ti Oahu (Toll Free): 1-800-442-VOTE (8683)

TTY: 808-453-6150

Kadagiti Isla iti Ruar ti Oahu (Toll Free): 1-800-345-5915

Internet: www.hawaii.gov/elections

Office of Elections – FSVS518G

Naatur idi Pebrero 13, 2004