STATE OF HAWAII

OFFICE OF ELECTIONS

802 LEHUA AVENUE

 

 
PEARL CITY, HAWAII 96782

www.hawaii.gov/elections

 

KASURATAN ITI MAPASAMAK

PANAGBUTOS ITI HAWAII

 

 

DAGITI ELEKSION ITI HAWAII

 

Iti tunggal “even numbered” a tawen wenno iti tunggal tawen nga agngudo iti 0, 2, 4, 6, ken 8, ti Estado ti Hawaii ket mangangay iti ELEKSION PRIMARIA iti maikadua iti maudi a lawas ti Sabado ti Setiembre ken ELEKSION HENERAL iti umuna a Martes kalpasan ti umuna a Lunes ti Nobiembre.

 

Ti eleksion iti 2006 ket maangay kadagitoy sumaganad a petsa:

 

                        Primary Election:        Sabado, Setiembre 20, 2008

                        General Election:        Martes, Nobiembre 4, 2008

 

PANAGREHISTRO DAGITI BOTANTE

 

Tapno makabutos dagiti kualipikado a sitisen iti eleksion iti Federal, State wenno County, masapul nga agparehistroda tapno makabutosda. Mapalubosanka nga agparehistro no adda kenka dagitoy a kualipikasion:

 

·         Maysaka a sitisen wenno makipagili iti Estados Unidos.

·         Maysaka a residente wenno agnaed iti Estado ti Hawaii; ken

·         Di nakurkurang ngem 16 ti tawenmo (ngem masapul nga agtawenkanton iti 18 iti kaaldawan ti eleksion a pagbutosamto).

 

Alisto ken nalaka laeng ti agparehistro a kas botante: ti laeng panangkompleto wenno panangpil-apmo iti Affidavit on Application for Voting (a maawagan pay iti Wikiwiki Voter Registration Form) ken panangisubmitirmo itoy iti maitutop nga opisina ti City/County Clerk sakbay ti maudi nga aldaw (deadline) ti panagrehistro.

 

            Deadline ti Panagrehistro para iti Eleksion Primaria: Huebes, Agosto 21, 2008

            Deadline ti Panagrehistro para iti Eleksion Heneral: Lunes, Oktubre 6, 2008

 

 

 

PAKAAMMO KADAGITI AGDADAMO A BOTANTE NGA AGREHISTRO TAPNO AGBOTOS BABAEN ITI KOREO:

 

No dakayo ket (1) agrehistro tapno agbotos iti umuna a gundaway iti Estado ti Hawaii; ken (2) ibuson daytoy a Sapata iti Aplikasyon para iti Panagrehistro ti Botante (Affidavit on Application for Voter Registration), ibilin ti pederal a linteg (42 U.S.C. § 15483) a mangted kayo iti pammaneknek ti kinasiasinoyo. Maibilang kas pammaneknek ti kinasiasino ti kopya ti:

  • Agdama ken mabalin a maawat a ladawan ti kinasiasino, wenno
  • Agdama a kasuratan dagiti babayadan a serbisyo iti pagtaengan (utility bill), kasuratan ti bangko (bank statement), tseke ti gobierno, tseke a suweldo wenno dokumento ti gobierno a nakailanadan ti naganyo ken pagtaenganyo (address).

No saan yo nga ited dagiti kasapulan a pammaneknek ti kinasiasinoyo a kadua daytoy nga Affidavit on Application for Voter Registration, nasken nga itedyonto dagitoy iti lugar a pagbotosanyo, wenno kadua ti ibusonyo a balota yo kas absentee voter.

 

ELEKSION PRIMARIA

 

Ti Primary Election wenno Eleksion Primaria ket maysa a proseso ti nominasion tapno mapili dagiti kandidato a mangirepresentarto kadagiti partido politikal iti General Election wenno Eleksion Heneral. Sika, ti botante, ti mangpilinto kadagiti kandidato ti pardito politikal a kayatmo. Ti pilim a partido ken dagiti pilim a kandidato ket agtalinaedto a sekreto.

Iti panagbutos iti Primary Election, maikkanka iti maysa a set ti color-coded party ballots (balota nga adda kolor a pagilasinan) iti maysa a Ballot Card, ngem ti butosam ket aggapu iti maysa laeng a party ballot wenno iti maysa a nonpartisan ballot. No aggapu iti nasursurok ngem maysa a party ballot wenno nonpartisan ballot dagiti piliem a kandidato, maawanto ti serbi ti butosmo.

 

Special Nonpartisan Offices

Iti Primary Ballot Card, ti Board of Election ken county election contests ket mailista nga agsina iti puraw nga “Special Nonpartisan Offices Ballot.” Iti Special Nonpartisan Offices Ballot, mabalinmo ti agpili kadagiti kayatmo a kandidato para iti Board of Education ken County contests a mainayon kadagiti kandidato a pinilim iti party wenno iti nonpartisan ballot.

 

Ti tunggal contest ket ibagana ti husto a bilang dagiti silulukat a takem wenno posision a mapili iti dayta a contest. Para iti dadduma a contests, mabalin nga adda dagiti makuna a multiple seats wenno ad-adu a takem. Mabalinmo ti mangbutos iti di ad-adu ngem iti bilang dagiti kandidato a naituding para iti dayta a contest.

 

ELEKSION HENERAL

 

Iti Eleksion Heneral, mabalinmo ti pumili manipud kadagiti kandidato a nainominar iti Eleksion Primaria. Mabalinmo ti mangbutos kadagiti kandidato dagiti partido wenno kadagiti kandidato a nonpartisan wenno awan partidoda, ket dagiti pilim a kandidato, agtalinaed a sekreto.

 

Dagiti takem a Federal, State, ken County ket nailista iti General Ballot Card iti nasao a contest. Dagiti kandidato a para iti tunggal takem ket mailista a maisurot iti panagsasaganad ti alpabeto ket mailanad met ditoy no partisano (adda partidona) wenno saan a partisano (awan kanunonganna a partido). Mabalinmo ti pumili iti kayatmo a kandidato para iti tunggal contest. Mabalinmo pay ti pumili iti kayatmo a kandidato para iti Office of Hawaiian Affairs (OHA).

 

Para iti dadduma a contests (OHA ken Board of Education), mabalin nga adda dagiti multiple seats wenno ad-adu ngem maysa a takem. Mabalinmo ti mangbutos iti saan nga ad-adu ngem iti bilang dagiti kandidato a naituding para iti tunggal contest.

 

ABSENTEE VOTING WENNO PANAGBUTOS DIKAN MAPAN ITI PRESINTO

 

Asino man a rehistrado a botante ket mabalin nga agbutos babaen ti absentee ballot—babaen ti koreo wenno iti panagparangna a mismo iti naituding a pagbutosanna.

 

Kastoy ti agbutos babaen ti koreo:

·         Masapul a mangisubmitirka iti Application for Absentee Ballot (a maaw-awagan pay iti Wikiwiki Absentee Application form) wenno suratam ti City/County clerk iti lugar a nakairehistruam a kas botante. Nasken nga iti suratmo, ibagam ti adres a kayatmo a pakaipatulodan ti balota a kidkiddawem; ken

·         Masapul nga isublim ti nakompleto wenno napil-apam nga Application for Absentee Voter Ballot iti

                        City/County Clerk iti sumaganad a deadlines:

·         Primaria: Sabado, Setiembre 13, 2008

·         Heneral: Martes, Oktubre 28, 2008

 

·         Nasken nga isublim ti nagbutosam nga Absentee Ballot iti City/County Clerk iti lugaryo iti aldaw dagiti nadakamat nga eleksion.

 

Tapno makabutoska a mismo a saan a babaen ti koreo, masapul a mapanka agbutos iti pagbutosan nga intuding ti City/County Clerk iti lugar a nakairehistruam a kas botante. Saanen a nasken nga agkiddawka pay iti absentee ballot tapno makabutoska. Mapalubosanka nga agbutos kadagitoy naituding nga aldaw:

 

·         Primaria: Setiembre 8 – 18, 2008

·         Heneral: Oktubre 21 – Nobiembre 1, 2008

 

Kadagiti Unipormado ken Sitisen nga Adda iti Sabali a Pagilian

 

Ti panggep ti Uniformed and Overseas Citizens Absentee Voting Act (UOCAVA) ket tapno dagiti adda iti uniformed services (kas kadagiti soldado) ken dagiti sitisen nga adda kadagiti ganggannaet a pagilian nga awan iti lugarda iti panawen ti eleksion ket makapagbutosda met babaen ti absentee ballot iti primary, general, ken special elections para kadagiti takem a Federal. Ti Federal Voting Assistance Program (FVAP) ket tulonganna dagiti soldado ken kapadada nga adda iti uniformed services ken dagiti sitisen nga adda kadagiti ganggannaet a pagilian nga awan kadagiti bukodda a lugar iti panawen ti eleksion tapno makapagrehistroda a kas botante ken tapno makakiddawda iti absentee ballots. No ti nakiddaw nga absentee ballot ket

maladaw a mapasangpet ti botante, mabalin a mausar ‘tay makuna a Federal-Write-

in Absentee Ballot (FWAB) iti panagbutos iti General Election para kadagiti takem a Federal. Mabalin a maala dagiti FWABs babaen dagiti Voting Assistance Officers kadagiti instolasion militar wenno kadagiti embahada/konsulado. Dagiti nayon nga impormasion maipanggep itoy ket maala iti website ti FVAP iti http://www.fvap.gov/index.html.

 

NO SADINO TI PAGBUTOSAN?

 

Sakbay ti eleksion, dagiti umno ti pannakarehistroda a botante iti Estado ti Hawaii ket makaawatda iti postcard a nakailanadan ti Pakaammo a Nairehistroda a Kas Botante ken Pannakakompirma ti Adresda wenno ‘tay makuna a Notice of Voter Registration and Address Confirmation (NVRAC) postcard. Iti NVRAC, mailista no ania ti/dagiti eleksion a mabalin a pagbutosan ti botante, ti numero ti distrito/presinto ti botante, ken ti polling place wenno lugar a pagbutosanna.

 

No kayatmo a maammuan no rehistradoka a botante wenno saan, ken no kayatmo a siguraduen no sadino ti naituding a polling place wenno pagbutosam, mabalinmo a kontaken weno kauman ti City/County Clerk iti bukodmo a lugar, kas sumaganad:

 

County of Hawaii:                                961-8277

County of Kauai:                                 241-6350

County of Maui:                                   270-7749

City & County of Honolulu:                  768-3800

 

 LUGAR A PAGBUTOSAN KEN ORAS TI PANAGBUTOS

 

Dagiti polling places wenno pagbutosan ket aglukat iti alas 7 iti bigat ken agserra iti alas 6 iti malem. Tapno maliklikam ti atiddog a pila iti pagbutosan, agbutoska no bassit pay ti tao, kas koma kadagitoy nga oras:

 

·         Iti bigat, iti nagbaetan ti alas 9:30 iti bigat ken alas 11:00 iti bigat.

·         Iti malem, iti nagbaetan ti ala 1 iti malem ken alas 4 iti malem.

 

TIME OFF WENNO IRURUAR ITI TRABAHO TAPNO MAKAPAGBUTOSKA

 

Sagudayen ti paglintegan iti Hawaii a mapalubosanka a maaddaan iti dua nga oras a time off wenno kaawanmo iti trabahom tapno makapagbutoska. Maikalikagum ti pannakisaritam iti employermo wenno iti pagtartrabahuam maipanggep iti panag-timeoffmo iti trabahom babaen ti ipapanmo panagbutos sakbay wenno kalpasan ti panagtrabahom, no mabalin.

 

DAGITI BOTANTE NGA AGKASAPULAN ITI ESPESIAL A PANNARABAY

 

            Dagiti botante nga agkasapulan iti espesial a pannarabay iti lugar a pagbutosan iti Aldaw ti Eleksion ket masapul a makisarita wenno makiumanda iti Voter Assistance Official iti naituding a lugar a pagbutosanda.

 

 

 

 

Daytoy a Factsheet ket nairanta laeng a pangimpormar wenno pangilawlawag a saan ket a agbalin nga autoridad maipanggep iti paglintegan ti eleksion ken deadlines iti Hawaii. Dagiti kasapulan wenno rekisito ken/wenno deadlines ket mabalin nga agbaliw no adda met panagbaliw ti paglintegan. Para iti ad-adda pay detaliado ken hushusto a rekisito, konsultaen ti Hawaii Revised Statues ken dadduma pay a mabalin a pangalaan iti mainaig nga impormasion.

 

Office of Elections

802 Lehua Avenue

Pearl City, Hawaii 96782

Telepono: 808-453-VOTE (8683)

Kadagiti Isla iti Ruar ti Oahu (Toll Free): 1-800-442-VOTE (8683)

TTY: 808-453-6150

Kadagiti Isla iti Ruar ti Oahu (Toll Free): 1-800-345-5915

Internet: www.hawaii.gov/elections

 

 

Office of Elections – FSVS522N

Naatur idi 3/11/08