Ti Karbengan nga Agbutos

Ti karbengan nga agbutos ket maysa a kangrunaan a karbengan ken pagrebbengan ti maysa a demokratiko a gimong. Sakbay a makabutos ti maysa a tao, masapul a rehistrado a botante daytoy. Ti panagrehistro a kas botante ket boluntario nga aramid ken masapul a raemen a kas indibidual a karbengan ti asino man a sitisen wenno makipagili.

Ti maysa nga indibidual ket mapukawna ti karbenganna nga agbutos no:

1. inkeddeng dagiti korte nga adda diperensia ti panagpampanunotna; wenno

2. maibalud gapu iti maysa a pagbasolan.

Pannakatarabay Dagiti Botante nga Addaan Kadagiti Espesial a Kasapulan

Dagiti pasiente a nabayagen nga agyan kadagiti care homes wenno dagiti pasiente a di nanamnama a naadmit wenno naiserrek iti ospital ket mapalubosan nga agbutos.

Tapno maipanamnama ti seguridad ken integridad dagiti aramid nga adda pakainaiganna iti eleksion kadagiti care facilities, amin nga staff members wenno agpapaay kadagiti care facilities ket maigunamgunam a dida koma makibibiang a direktamente iti panagrehistro ken panagbutos ti residente a kas absentee voter. Tumulong laeng asino man nga staff iti kanito a makaawat iti espesipiko nga autorisasion wenno pammalubos manipud iti residente (botante).

No agkiddaw ti botante iti pannarabay, ti care facility staff ket masapul nga agtalinaed a nonpartisan wenno awan kankanunonganna a partido ken masapul nga adda dua a tao a SAAN nga agpada ti kanunonganda a partido a makaimatang iti panangtarabayna iti nasao a botante. No kastoy ti maaramid, maliklikan ti atap nga adda naaramid nga iregularidad bayat ti pannakatarabay ti botante.

Mainayon itoy:

· Patinayon koma a panunoten wenno ikkan iti pateg ti karbengan a panagbutos dagiti pasiente ken kameng ti pamiliada;

· Liklikan ti inggagara wenno di naigagara a panangdiskriminar wenno panangpilit iti maysa a tao nga agrehistro a kas botante. Agpada dagitoy a di ipalubos ti linteg.

· Dagiti nakompleto wenno napil-apan a porma iti voter registration (voter registration forms) ket saan a kolektaen ti immay nagited a tao wenno organisasion malaksid no adda espesipiko nga autorisasion wenno pammalubos nga inted ti clerk wenno ti chief election officer;

· No agkiddaw ti maysa a botante babaen ti koreo tapno maikkan iti absentee ballot, masapul nga ikoreo ti botante dayta a kiddaw ken iturongna a direktamente iti clerk.

· Ti panagkopia, panagduplikado wenno panangusar iti ania man nga impormasion nga insurat ti asino man nga indibidual iti porma ti rehistrasion (registration forms) ket maiparit. Dagiti impormasion nga inlanad ti maysa nga indibidual iti apidabit para iti rehistrasion ket maibilang koma a sekreto.

· No agpaayka nga intermediary wenno naibaon/naginnanakemka a mapan mangala iti absentee ballot, nasken a mangalaka iti letter of authorization wenno surat a mangited kenka iti pammalubos manipud iti rehistrado a botante ken masapul nga idatagmo daytoy iti Clerk sakbay a maalam ti absentee ballot.

· Awan ti asino man nga agkiddaw iti maysa a botante tapno ipakita ti botante ti linaon ti balotana ken no ania ti pilina a partido.

· Awan ti asino man a mangmarka wenno mangsurat iti balota ti asino man a tao malaksid no adda pammalubos daytoy a tao.

· Ti panangpadas nga agbutos iti nagan ti pasiente nga awan ti naited nga espesipiko a pammalubos mainaig itoy ket maibilang nga ilegal wenno maikontra iti linteg.

Dagiti Karbengan Tapno Matarabay ti Asino Man iti Panagbutosna

Asino man a botante nga agkasapulan iti tulong wenno pannarabay mainaig iti panagbutosna gapu iti rason a pisikal, bisual wenno parikut iti mata, kaadda ti parikut iti panagdengngeg, wenno parikut iti panagbasa wenno panagsurat wenno di makabasa wenno di makasurat ket mabalin a tulongan ti asino man a tao a pili ti botante a maseknan, malaksid iti employer ti botante, ti ahente wenno pannakabagi ti employer ti botantemm wenno asino man nga opisial wenno pannakabagi ti union a pagkamengan ti botante (42 United States Code 1973aa-6).

Daytoy a Factsheet ket nairanta laeng a pangimpormar wenno pangilawlawag a saan ket a agbalin nga autoridad maipanggep iti paglintegan ti eleksion ken deadlines iti Hawaii. Dagiti kasapulan wenno rekisito ken/wenno deadlines ket mabalin nga agbaliw no adda met panagbaliw ti paglintegan. Para iti ad-adda pay detaliado ken hushusto a rekisito, konsultaen ti Hawaii Revised Statues ken dadduma pay a mabalin a pangalaan iti mainaig nga impormasion.

Office of Elections

802 Lehua Avenue

Pearl City, Hawaii 96782

Telepono: 808-453-VOTE(8683)

Para Kadagiti Isla iti Ruar ti Oahu (Toll Free): 1-800-442-VOTE(8683)

TTY: 808-453-6150

Para Kadagiti Isla iti Ruar ti Oahu TTY Toll Free: 1-800-345-5915

Internet: www.hawaii/gov/elections

Office of Elections – FSVS524D

Naatur idi Disiembre 8, 2004