OFFICE OF ELECTIONS

Estado ti Hawaii

 

DWAYNE D. YOSHINA

Hepe opisyal ti eleksyon

 

 

KASURATAN ITI MAPASAMAK

PANNAKAKUESTION TI KINAASINO TI BOTANTE

 

Ti asino man a rehistrado a botante ket mabalinna a kuestionaran ti karbengan ti  asino man a tao nga agrehistro wenno ti panagtalinaed daytoy a kas rehistrado a botante iti ania man a presinto (HRS § 11-25) mainaig kadagitoy a pagbatayan:

 

1)      Ti botante ket saan nga isu ti tao a kas ibagbagana.

2)      Ti botante ket saan a residente wenno agnaed iti dayta a lugar ket awan ngarud ti karbenganna nga agbutos iti dayta a presinto.

 

Ti karbengan a mangkuestionar iti botante ket masapul tapno masaluadan ti integridad ti proseso ti eleksion babaen ti panangipasiguradona a dagiti laeng kualipikado nga indibidual ti mapalubosan nga agbutos. Dagiti met botante a makuestionar ket agtalinaed met kadakuada ti karbenganda a mangipila wenno mangidatag iti apela wenno kontra-kuestion.

 

Pakaammo iti panagkuestion sakbay ti aldaw ti eleksion

 

1)      Ania man a panagkuestion sakbay ti aldaw ti eleksion ket masapul a maisurat ken maisubmitir iti City/County Clerk, ket iti surat, nasken nga ilawlawag ti agkukuestion dagiti pagbatayanna a nakaigapuan ti panagkuestionna.

2)      Nasken a pirmaan ti tao nga agkukuestion ti nasao a surat.

3)      Apaman a maawat ti City/County Clerk ti naisurat a kuestion, ti met laeng City/County Clerk ti mangpakaammo a dagus iti tao a nakuestionaran.

4)      Ti Clerk ket imbestigarenna ti kuestion ken ipaulogna ti pangngeddengna iti kasapaan a panawen.

 

Panangapela iti Pangngeddeng ti Clerk Sakbay ti Eleksion

 

1)      Ania man nga apela wenno kontra-kuestion ket masapul a naisurat ken maidatag iti uneg ti sangapulo nga aldaw apaman a maipakaammo ti Clerk ti pangngeddengna iti tao a nakuestionaran; ket iti nasao nga apela, masapul a mailanad dita ti linaon ti desision ti Clerk a kayat a maapela, ken nasken a maibaga dagiti pagbatayan no apay a makuna a nagbiddut ti Clerk iti desisionna. Ti nagan ti tao a nakuestionaeran ket masapul met a mailanad iti apela.

 

2)      No ti apela a naidatag iti Board of Registration ket mapatuloy wenno maikkan iti pateg, sertipikaran a dagus ti Board dayta iti City wenno County Clerk.

 

3)      Ti Board of Registration ket mabalinna no kuan ti mangangay iti informal a pre-hearing conference wenno panagsasarita sakbay a maangay ti bista tapno:

 

a.      Malawlawagan a nasayaat dagiti isyu.

b.      Mangaramid kadagiti nasken nga enmienda iti notisia wenno enmienda iti pannakaipakaammo dagiti pammabasol, wenno iti sungbatna, no adda;

c.      Panangalana kadagiti nasken a dokumento a manamnama a mangipakita iti kinapudno tapno maliklikan ti pannakapataud dagiti di makatulong a pammaneknek; pananglimita iti bilang dagiti eksperto a saksi; ken

d.      Sabsabali pay a materiales a mabalin a makatulong iti nadaras a pannakarisut ti parikut.

 

4)      Ti notisia wenno pannakapakaammo ken gundaway a makipartisipar ket maited iti tunggal tao nga adda pannakaibiangna itoy a banag ken iti abogado dagitoy.

 

5)      Kalpasan ti bista wenno panagdengngeg, ti Board ket mabalin a mangited iti oral wenno maisawang a desision wenno saan, mangipaulogto laengen iti naisurat a desisionna iti naladladaw a petsa. Ngem mangted man wenno saan ti Board iti oral a desision, mangipaulog ket mangipaulogto ti Board iti naisurat a desision ket mairamanto ditoy a mailanad dagiti natakuatanna a kinapudno ken no ania met ti makuna ti linteg.

 

6)      Ti Board ket pakaammuannanto ti tao a nadehado, ket daytoy a tao, mabalinna nga apelaen ti desision ti Board iti Korte Suprema ti Hawaii iti uneg ti sangapulo nga aldaw apaman a maawat daytoy a tao ti naisurat a desision ti Board.

 

7)      Ti notipikasion wenno pakaammo ket addaanto iti kopia ti HRS, Chapter 11, Part IV (Appeal from Board of Registration).

 

8)      Awanto ti konsideraen ti Board a motions for reconsideration wenno kiddaw tapno makonsidera manen ti maysa a banag.

 

Panangipakaammo iti Panagkuestion iti aldaw ti eleksion

 

1)      Ti panagkuestion a mapasamak iti presinto wenno lugar a pagbutosan ket masapul a maipila wenno maidatag iti Presinct Chairperson. Ti panagkuestion ket saan a nasken a maisurat.

2)      Ti Chairperson ken dagiti Precinct Officials, a saan nga agpapada ti partidoda, ket masapul nga urnongenda dagiti kasapulan nga impormasion maipanggep iti dayta a kuestion sa irekordda dagitoy iti porma wenno form a maawagan iti “Report of the Board of Registration.”

3)      Ti kuestion ket masapul nga ikonsidera ken desisionan a madagdagus dagiti precinct officials ket ti pangngeddeng, ipakaammo met ti Precinct Chairperson.

4)      Asino man a tao a makuestionaran ket maited kenkuana a madagdagus ti gundaway a mangaramid kadagiti maikanatad a panangatur iti pannakakuestionarna kas sagudayen ti HRS 11-21.

 

 

 

Panangapela iti Pangngeddeng ti Precinct Official iti Aldaw ti Eleksion

1)      No awan ti apela a maaramid mainaig iti pangngeddeng ti Presinct Chairperson manipud iti asino man kadagiti nangkuestion ken ti nakuestionaran a botante, ngarud:

 

a.      Ti botante ket mabalin a mapalubosan nga agbutos, wenno

b.      Ti botante ket maparitan nga agbutos kas sagudayen ti naipaulog a pangngeddeng.

 

2)      No awan ti apela a naaramid, ti desision ti Precinct Chairperson ket maibilang a pinal ken rumbeng a masurot.

 

3)      Ti tao a nadehado ket mabalinna ti mangidatag iti apelana iti Board of Registration kontra iti ania man a pangngeddeng nga impaulog dagiti precinct officials mainaig iti panagkuestion a napasamak iti aldaw ti eleksion.

 

4)      Ti apela ket maidatag iti sango ti nagkuestionar ket ti met nakuestionaran a botante, pumanaw iti presinto wenno pagbutosan.

 

5)      No adda apela a naaramid, mabalin a ti nagkuestionar ken ti nakuestionaran ket agpada a maseknan iti apela.

 

6)      No ti apela ket maipan iti Board of Registration:

 

a.      Ti apela ket masapul a maaramid sakbay nga agbutos ti nakuestionaran a botante, wenno sakbay a ti nangkuestionar iti nakuestionaran a botante ket pumanawen iti pagbutosan, ania man ti umuna kadagitoy.

b.      Ti nakuestionaran a botante ket mapalubosan nga agbutos. Ti balotana ket maipan iti sobre a narikpan ket mamarkaan iti “Challenged Ballot” tapno mairamanto a mabilang wenno saan, ma-reject wenno dinto mairaman a mabilang dependento iti maipaulog a pangngeddeng.

c.      Ti narikpan a sobre ket maidulin iti ballot box (babaen ti Presinct Chairperson) iti imatang ti nakuestionaran a botante.

d.      Ti Precinct Chairperson ket ipakaammona iti clerk ti kaadda ti nakuestionaran a balota a maideposito iti ballot box ken ilawlawagna dagiti banag a mainaig iti nasao a pannakakuestionar ti nasao a balota.

e.      Ti Board ket pagpapatanganda ti nasao a panagkuestionar ken mangaramidda iti desision maipanggep iti apela.

f.        Mairaman a mailanad iti minutos (minutes) ti Board ti pakabuklan ti nagpapatangan ti Board, ti desision ti Board, ken dagiti rason no apay a kasdiay ti desision ti Board.

g.      Pakaammuanto ti Board ti Precinct Chairperson ken ti City wenno County Clerk maipanggep iti desisionna.

h.      Ipakaammonto met ti Precinct Chairperson ti pangngeddeng ti Board iti nagkuestionar ken iti nakuestionaran.

 

7)      Ti Precint Chairperson ket nasken a pakaammuanna met ti tao a nadehado a mabalin daytoy nga apelaen ti desision ti Board iti Korte Suprema ti Hawaii.

 

8)      No ti apela ket maipan iti Korte Suprema ti Hawaii, agtalinaed ti balota iti narikpan a sobre tapno mairaman a mabilang wenno saan, ma-reject wenno di mairaman a mabilang, depende iti maipaulogto a pangngeddeng mainaig iti apela.

 

9)      No kasapulan, ti register ket maatur tapno maikumplontar iti desision ti korte.

 

10)  No awan ti apela a maipan iti Korte Suprema ti Hawaii, dagdagusen ti City wenno County Clerk a pakaammuan ti ballot counting center maipanggep iti napasamak iti panagkuestionar. Ti nakuestionaran a balota, mairaman a mabilang, wenno saan, di mairaman a mabilang, kas sagudayen ti HAR, Section 2-51-101.

 

11)  Iti amin a gundaway, ti amin a banag maipanggep iti balota ti nakuestionaran a botante ket masapul a masaluadan.

 

12)  Amin a dokumento a mainaig iti panagkuestionar ken dagiti napagsasaritaan ket maikuyogto iti minutos ti miting (minutes of the meeting) para iti ikut a rekord ti tunggal Board of Registration.

 

Daytoy a Factsheet ket nairanta laeng a pangimpormar wenno pangilawlawag a saan ket a agbalin nga autoridad maipanggep iti paglintegan ti eleksion ken deadlines iti Hawaii. Dagiti kasapulan wenno rekisito ken/wenno deadlines ket mabalin nga agbaliw no adda met panagbaliw ti paglintegan. Para iti ad-adda pay detaliado ken hushusto a rekisito, konsultaen ti Hawaii Revised Statues ken dadduma pay a mabalin a pangalaan iti mainaig nga impormasion.

 

Office of Elections

802 Lehua Avenue

Pearl City, Hawaii 96782

Telepono: 808-453-VOTE(8683)

Para Kadagiti Isla iti Ruar ti Oahu (Toll Free): 1-800-442-VOTE (8683)

 

 

 

 

Office of Elections – FSVS526A

10/01